Saturday, June 7, 2008

احتفالية خروج رجالة المحلة


كنت قد قررت اعتزال الكتابة فى المدونة لولا كلمة عامل المحلة كمال الفيومى فى الاحتفالية امس لى باننا لابد لنا من استعمال كل سلاح وانت من ضمن اسلحتك الكلمة احنا ضحينا كتير ولسة هنضحى بس الخسائر المرة الجاية هتكون عندهم متسبش سلاحك احنا كنا معتقلين وعندنا امل ان فى رجالة بره صوتها عالى هيدافعوا عن كمال وكريم وطارق وكل عمال المحلة كل المناضلين والمدونين والصحفيين الشرفاء وقالى بالكلمة الواحده متسبش القلم ووعتة انى مش هسيبوا

نتكلم بقى عن الاحتفالية

كان يوم رائع بكل المقاييس كان امن الدولة محاصر مركز الدرسات الاشتراكية لكن ده ممانعش ان الحفلة كانت عن اخرها كل اليسار المحترم كان هناك ,وبدا اليوم بتسليم شهادات التقدير لكل من كمال الفيومى وطارق السنوسى وكريم البحيرى وكان لكل واحد منهم كلمة

كمال الفيومى



عاوز اقول ان شهادات التقدير اللى احنا خدناها كان اولى بيها الناس الشرفاء اللى دفعوا عنا منهم الاستاذ عبد الحليم قنديل اللى مشرفنا والاستاذ ابراهيم عيسى والاستاذ مصطفى بسيونى واستاذ هشام فوائد ومركز الدرسات الاشتراكية وطبعا عمال المحلة الشرفاء

لان الناس دى كانوا هما اللى مسجونين مش احنا اللى كنا مسجونين لان الناس دى لولا كلمهم الصادق ودفاعهم عنا مكناش قدمكم دلوقتى وعاوز اوجة كلمة لحسين مجاور اللى قالى بالحرف الواحد ياكمال انت هتروح ورا الشمس انا بقولة يا مجاور الشمس طلعت ....شمس الحرية طلعت يا مجاور لان كمال الفيومى وكريم وطارق لما اعتقلوا كنا فكرين ان الامن كسب الجولة الا ان انتوا رديتوا الصاع صاعين بانكم كتبتوا باخلاص ودافعتوا عننا اننا نخرج كل الناس دى(فى اشارة للحضور) هما السبب اننا نكون قدمكم دلوقتى وبشكركم

هيثم محمدين محامى العمال المعتقلين

فى البداية انا بحيى عمال المحلة انا بدايتى مع العمال كانت مع والدى اللى كان فى ذكرى 89 كان والدى عامل فى الحديدي والصلب جاء الينا نقابى اصفر هو صلاح هيكل ,قاطعه فؤاد نجم وقالوا بدون ذكر اسماء صلاح هيكل وبعدين,قالوا خليك معانا وهتبقى هتبقى مليونير وسعتها مكنتش فاهم ازاى اتنين عمال واحد مليونير والتانى يادوب بيقضى يومه لكن فهمتها دلوقتى عارفت يعنى اية نقابة عميلة وعمال شرفاء انا اتعلمت من عمال المحلة شفت ازاى القانون اللى درستة فى الكلية ده شفت ازاى هو منحاز لصالح مؤسسات الدولة ولسلطة راس المال والسلطة العسكرية العمال افرجوا عنهم على طول قررات اعتقال وضربوا بالقضاء وقرار النائب العام عرض الحائط

وسمعت كلام فى المحلة خطير جدا ان الراسمالين الكبار فى المحلة جمعا تبرعات 300000جنية واستضافوا القيادات الامنية فى فندق كبير فى المحلة ده بيورينا ازاى الناس دى متوحدين ضدنا وان الامن وراس المال وجهان لعملة وحده وفى النهاية انا معملتش حاجة للمحلة الا انى اتعلمت منهم وبتمنى اليوم اللى الناس كلها تقف ورا العمال لانهم خلاصنا


ابو النجوم ابدع وسمعتا شيد قصورك وعريس الدولة والبتاع



كمال كان هيطير بالعمال طير


كمال وسط اولاده


دى كانت تعليقه صغيرة عن اليوم طبعا انا مكنتش مغطيها كلها لان بصراحة مكنش فية نفس كنت باخد كلمتين واخرج اخد نفس من الزحمة وفى النهاية نقول عاش كفاح الطبقة العاملة عاش كفاح عمال المحلة

وسمعين صوت المكن الداير بيقول بس كفاية مذلة نفس الصوت اللى فى حلوان بيقول شد الحيل يا محلة

14 comments:

Che_wildwing said...

ش هقول حاجة اكتر من انكوا شوية اندال
وازاي محدش قالى

انجلز said...

والله انا نفسى عرفت بالصدفة

Che_wildwing said...

خلاص هنعديها المرة دي

Anonymous said...

مش هقول غير حاجة واحدة بس...لما ببص للرجالة دى...بحس ان لسة فى أمل أخد علشانه نفَسى فى اللحظة الجاية

Anonymous said...

وحمدالله عالسلامة يا رفيق...كان ليك وحشة والله

mashahed said...

عوداً حميداً يا رفيق ... وحشتنا كتاباتك

مصطفى محمود said...

يا ندل يا واطى يا معفن ..مهانش عليك تقولى وانت فى ميدان الجيزة !! احا !! وبعدين صدفة اية يا روح ماما


بس لما اشوفك

انجلز said...

ماشى ياعمنا واوعدك هقولك لو فى حاجة جديده
رؤى ومشاهد
شكرا على المرور وكنتم خير رفاق فى الاوقات الصعبة
درش
خف عليا شوية ياعم بجد عرفت يوميها براحة مش كدا ليقولوا الحزب معرفش يربيك

EGYPT EYES said...

تصدق الواحد أتغاظ اما شاف الصور دي هو واضح طبعا أن الرفاق في العاصمه محظوظين D:

انجلز said...

ياعيون دى 3 سعات بينك وبين العاصمة وبعدين مفيش احلى من اسكندرية

>>> said...

مبروك يا إنجلز

مبروك أولاً على عودتك لمدونتك

ثانياً مبروك لعودة أسود المحلة إلى عرينهم

إوعى تفكر في الغيبة تاني

لأنّ واضح إنّ جمهورك كبير وبيحبك

تحياتي رفيقي العزيز

انجلز said...

الرفيق تشى براء
متشكر كدا على الزيارة واوعدك بانى مش هسبها تانى ومنورنا دايما يارفيق

Wohnungsräumung said...

Le succès .. J'espère que le nouvel écran est toujours

Räumung wien said...


مدونة مميزة
كل تقديرى واحترامى لكم ... :)